Qırımtatar Milliy Meclisiniñ reis muavini Ahtem Çiygoz işiniñ daa bir mahkeme oturışında 2014 senesi fevral ayında Sergey Aksenovnıñ muafızı olğan şaat sorğuğa çekile. Bunı noyabr 3-de Çiygoznıñ advokatı Nikolay Polozov Twitterde bildirdi.
«Qabaatnıñ nevbetteki şaatı Akimov Aleksey Vladimiroviç. 2014 senesi fevral 26-daki adise-vaqialar vaqtında Akimov Aksenovnıñ şahsiy muafızı edi», – dep yazdı Polozov.
Advokatnıñ aytqanına köre, al-azırda şaat Rusiye Milliy gvardiyasınıñ bölük komandanı olıp hızmet ete.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
