«Hizb ut-Tahrir davası» boyunca yaqalanğan Yalta altısına mecburiy psihiatrik ekspertiza yapılacaqtır. Bunı noyabr 2-de Qırım advokatı Edem Semedlâyev Facebookta bildirdi.
Advokatnıñ aytqanına köre, İlmi Ümerovdan örnek alıp, «Hizb ut-Tahrir davasınıñ» iştirakçileri psihiatrik ekspertiza keçirilmesine razı olmadılar.
«Buña cevap olaraq taqiqatçı mecburiy psihiatrik ekspertizanı keçirmek qararını çıqardı. Biz bunı basqı dep sayamız, çünki ceza tibbiyeti mahküm etilgenlerge basqı olaraq qullanıla», – dep qayd etti Semedlâyev.
Advokatnıñ zanınca, mahküm etilgen altı kişi bundan keçecektir.
Sentâbr 16-da Rusiye kontrol etken Qırım Yuqarı mahkemesi «hizb ut-Tahrir davasınıñ» iştirakçileri Müslim Aliyev, Arsen Cepparov ve Refat Alimovnıñ apis cezasını dekabr 8-ne qadar uzatmaq qararından bergen şikâyetlerini red etti.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Refat Alimov 2016 senesi aprel ayında rusiyeli uquq qoruyıcılar tarafından aynı «Hizb ut-Tahrir» ile bağlı olğanında şeklenilip, yaqalandı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
