Kefede eskiden Hanlar camisi yerleşken yerde Rusiyege qoltutqan erbaplar Rusiye ortodoks kilsesiniñ ibadethanesini qurmağa planlaştıralar, dep bildirdi Facebookta «Umma» Ukraina musulmanları diniy idaresiniñ müftisi Said İsmagilov.
İsmagilovnıñ aytqanına köre, işğalden evel bu yerde arheologik qazmalar yapılacaq edi, bu diniy kompleksniñ bazı inşaatları ğayrıdan tiklenecek. Leyha bile azır edi.
«Kefe musulman aleminde Qırım ilâhiyatçılarınıñ belli şeeri edi. Qırım hanlığınıñ eñ meşur alimi Kafavi soyadını taşıy edi – «Kefede» doğğan. Bu ilmiy ve ilâhiyatt fikriniñ merkezi «Han-Cami» kompleksi olğan edi. ROK aynı bu yerde kilseni ne maqsat ile quracaq ola belli degil. Amma böyle bir şey olsa, Qırımnıñ bu tarihiy ve medeniy yadikârlığınıñ canlandırılmasına olğan ümütler kömülecektir», – dep ayttı İsmagilov.
Müftiniñ aytqanına köre, Qırım musulmanları cami yerinde ortodoks ibadethanesini qurma niyetlerini aydınlatmağa rica ete.
«Mında bizler bunı ayta bilemiz, işğal olunğan Qırımda ise insanlar qorqa», – dep qayd etti İsmagilov.
Kreml kontrol etken Qırım ükümeti Qarasuvbazar rayonınıñ Kökey (Rusakovka) köyüniñ memuriyetine haç tiklenmesi içün topraq damartısınıñ berilmesi añlaşıldı.
Aqmescit-Kefe yolunda, qırımtatarlar toplu yaşağan Boğurça qasabası yanında, sentâbr 26-da saba ortodoks haçı tiklendi.
Bundan evel yarımada toprağında kazak cemiyetleriniñ teşebbüsi ile onlarnen ortodoks haçı tiklendi. Farqlı yıllarda, 2000 senesinden başlap, diger din temsilcileri tarafından böyle şeyler qarşılıq doğura edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
