Qırımtatar Milliy Meclis reisiniñ muavini İlmi Umerovnı 2 noyabr, çarşenbe kününe FSB idaresine çağırdılar. Anda oña yañı qabaat seslendirilecek. Bunı Facebookta onıñ qızı – Ayşe Umerova haber etti.
«Yarın saat 15.30-qa İlmi Umerov FSB-ge çağırıldı, ve taqiqatçı Skripkanıñ aytqanına köre, oña yañı qabaat bildirilecek. Bu nasıl bir yañı qabaat olacağını o, elbette ki, aytmadı, bararmız – ögrenermiz», – dep yazdı Ayşe Umerova.
Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.
Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.
Sentâbr 7-de İlmi Umerov klinikadan çıqtı.
20 oktâbrde Umerovğa tanış olmaq içün lingvistik ve psihiatrik-mahkeme ekspertizalarınıñ neticeleri kösterildi.
