Qırım işgali sebebinden AQŞ tarafından yapılğan yaptırımlar Yalta kinostudiyasınıñ inkişafına keder etken. Öyle fikirni Qırım.Aqıqat Radiosınıñ saba yayınında iş adamı, Yalta kinostudiyasınıñ saibi Sergey Arşınov bildirdi.
«Ğarp yaptırımları olmasa edi, belki de kinogruppalar daa çoq kelir edi, men bunda eminim. 2000 senesinden başlap kinostudiyanıñ zemaneviy tarihını alsaq, bizler yüzden ziyade film çekimlerine yardım ettik ve özümiz çıqardıq. Ve muracaq etkenlerniñ esas qısımı Rusiyeden gruppalar edi», – dedi Arşınov.
2014 senesi sentabr 2 künü rus Qırım parlamenti Yalta kinostudiyasını yarımadanıñ mülküne 1,3 mln. grivnağa (vaqıtnıñ para fiyatına köre, tahminen 3,7 mln. ruble) satın almağa qarar aldı. Qırımdaki Rusiye akimiyeti Yalta kinostudiyasınıñ mülküni Kremlge bağlı olğan Qırım Medeniyet Nazirligine teslim etti.
2014 senesi sentabr 10 künü Rusiyege bağlı Qırım Parlamenti 15 yıl evelsi alınğan qararını red etti ve Yalta kinostudiyasınıñ aktsiyalaştırılması ve esas isse senetleriniñ satılmasını lâğu etti ve böylece onı devlet mülküne qaytardı. Studiyanıñ saibi Sergey Arşınov akimiyetniñ yapqanını qanunsız tanıdı ve buña qarşı mahkemede itiraz bildirecegini ayttı. 2016 senesi avgust ayında Rusiye Yüksek Mahkemesi kinostudiyasınıñ «devletleştirüvi» aqqında qararını ükümde qaldırdı.
2015 senesi dekabr 22 künü AQŞ Rusiye ve Qırım kompaniyalarına qarşı yaptırımlar keçirgen edi. Amerika Maliye Nazirliginiñ açıqlağan cedveline Yalta kinostudiyası de kirgen.
