Rusiyeniñ Qırımdaki politsiya yolbaşçısı vazifesine qomşu Rusiyeniñ Vologda vilâyetiniñ politsiyasından – polkovnik Pavel Karanda tain etildi. Matbuat-hızmetiniñ malümatana köre, bu aqta fermannı Vladimir Putin 31 oktâbrde imzaladı.
«Politsiya polkovnigi Karanda Pavel Leonidoviçni Qırım İçki işler naziriniñ muavini – politsiya yolbaşçısı vazifesine (tainlemek – QA)», – dep aytıla bildirüvde.
Pavel Kandra Rusiyeniñ Omsk şeerinde doğdı. 2009 senesine qadar Murmanskta ve Murmansk vilâyetinde cinaiy taqiqatta farqlı vazifelerde çalıştı, 2013 senesinden berli Vologda vilâyetinde Rusiye İçki işler nazirliginiñ idaresinde yolbaşçı muavini olıp çalıştı.
Soñki bir-qaç ay devamında Qırımğa Rusiyeniñ çeşit regionlarından ketirilgen bir-qaç memur ve devlet hadimi tain etildi.
Merkeziy teşkerüv idaresiniñ yolbaşçısı vazifesine Moskvadan memur aındı, Aqyarda ise Mal ve topraq muamelelerini Udmurtiyalı sabıq nazir idare etecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
