Rusiyege bağlı Qırım Yuqarı Mahkemesinde noyabr 1 künü Meclis reisiniñ muavini Ahtem çiygoznıñ işi boyunca toplaşuvda qabaatlağanlarnıñ şaatlarını sorğudan keçireler. Bunı Twitterde qabaatlanğannıñ advokatı Nikolay Polozov bildirdi.
«Qabaatlağanlarnıñ birinci şaatı Krolman Aleksandr Nikolayeviç. «Narodnoye opolçeniye» («Halq milisi») azazı, 9-ncı rota», – dep yazdı Polozov.
Advokat dey ki, şaatnıñ sözlerine köre, 2014 senesi fevral 26 künü tarihında o «Yañı Ukraina» kazaklar birliginiñ azası edi.
«Qabaatlağanlarnıñ ekinci şaatı – Gaydar Aleksey Nikolayeviç. «Narodnoye opolçeniyeniniñ» 9-ncı rora komandiriniñ muavini», – dep yazdı Polozov.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
