Rusiye akimiyetiniñ resmiy neşiri «Rusiye gazetası» Sloveniya paytahtı Ljubljananıñ başı Zoran Jankovićten afu soradı. Afu soramaqnıñ sebebi – Sloveniyanıñ Qırım işğaline dair noqta-i nazarı gazetada yañlış akis etilgenidir. Rusiye akimiyetiniñ neşiri Sloveniya diplomatlarınıñ beyanatlarını ve olar tarafndan Qırım – Ukraina toprağı olaraq tanılğanı aqqında izaatlarını öz saifelerinde yerleştirdi.
«Rusiye Federatsiyasındaki Sloveniya elçiligi beyan etmeli ki, Sloveniya Cumhuriyeti Ukrainanıñ mustaqilligini ve teritorial bütünligini tanıp, ne Qırımdaki referendumnıñ neticelerini, ne de Qırımnıñ Rusiye Federatiyasına qoşulğanını tanımay ve bu – halqara uquqnıñ bozuvı olğanını tasdiqlay», – dep buyurıla Sloveniyanıñ Rusideki elçihanesiniñ beyanatında.
Sentâbr 29 künü «Rusiye gazetası» Lübov Protsenko müellifligindeki «Birlikte küçlücemiz» adlı maqalesini ye derc etken edi.
Müarririyetke Sloveniya Cumhuriyetiniñ elçiliginden mektüp keldi. Mektüpte qayd etile ki, mezkür maqaleniñ elektron şekilinde «Ljubljana şeer yolbaşçısı Zoran Jankovićniñ kerçek olmağan izaatlaı ketirile, sanki Sloveniya Avropada ilk devletlerden biri olup Qırım boyunca referendumnıñ neticelerini qabul etti. Ljubljana şeer yolbaşçısı Zoran Janković «Rusiye gazetasınıñ» jurnalistlerinen Qırım ve referendum aqqında qonuşmadı, ve Ljubljanada Moskva Künleri keçirilgen vaqıtta bu mevzuda bir şey aytmadı».
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
