Link açıqlığı

Saatnıñ esas haberi

İbraim Şirinniñ fikri qırımtatar halqınıñ fikrine zıt kele – siyasetçi


Emine Bagatırlı. Arhiv fotoresimi
Emine Bagatırlı. Arhiv fotoresimi

Qırımtatar Milliy Qurultayınıñ delegatı ve «UDAR» firqası Qırım teşkilâtınıñ reberi Emine Bagatırlınıñ zanınca, Vladimir Putin ile Umumrusiye halq cebesiniñ Qırım bölügi körüşüvinde qırımtatar halqınıñ temsilcisi olaraq sözge çıqqan İbraim Şirin yarımadada qırımtatarlarnıñ kerçek vaziyetini aydınlatmadı. Bunı Qırım.Aqiqat mühbiri bildire.

«Putinniñ Qırım işğalinden evel qırımtatarlarnıñ abadanlaştırılmasına para berilmegen kibi lafları bir şeyden haberi olmağanını isbatlay. Ukraina Vatanına qaytqan qırımtatar halqınıñ abadanlaştırması içün er şey yaptı. Qırımtatarlar toplu yaşağan qasabalar quruldı, milliy medeniyet ve tasilge emiyet berildi, akimiyet Qırımtatar Milliy Meclisiniñ fikrini köz ögüne ala edi. Şimdi ise Qırımdaki haberler qırımtatarlarnıñ apiske alınmas ve yañı repressiyalarnen bağlı. Meclis terroristik teşkilâtlar sırasına kirsetildi. İfade serbestligi eñ alçaq seviyede. Şirin bunıñ içün Putinge teşekkürlerini bildirse, qırımtatarlar onı içtimaiy ağlarda dostlarından çıqaralar», – dep izaatladı Emine Bagatırlı.

İbraim Şirinniñ izaatları şimdilik yoq.

Yaltadaki Umumrusiye halq cebesiniñ forumı vaqtında İbraim Şirin çıqışta bulundı. Tedbir teşkilâtçıları onı «qırımtatar halqınıñ temsilcisi» dep ilân ettiler. Şirin qırımtatarlar adından Rusiye prezidenti Vladimir Putinge «köstergen yardımı» içün teşekkür bildirdi.

Umumrusiye halq cebesiniñ lideri Rusiye prezidenti Vladimir Putin oktâbr 27-de Yaltadaki «Areketler forumı. Qırım» umumiy toplaşuvında iştirak etti. Yaltadaki forum – 2016 senesi Umumrusiye halq cebesiniñ regional forumlarından üçüncisidir. Birinci eki forum – Stavropol ve Yoşkar-Olda yanvar ve aprelde keçirildi. Forum iştirakçileri arasında faaller, UHC devlet ve regional ekspertleri, icra akimiyetniñ vekilleri ve jurnalistler bar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG