Qırımda oktâbr 31-de sağanaq olacaq dep, furtuna havfı ilân etildi. Bunı Kreml kontrol etken Qırım Fevqulâde vaziyetler nazirliginiñ matbuat hızmeti bildire.
«Qırımnıñ gidrometeorologiya ve etraf müiti monitoringiniñ idaresi bildirgenine köre, yaqın eki-üç saat devamında Qırımda küçlü yağmur, dağlarda – küçlü qar yağması beklenile», – dep qayd ete nazirlik.
Matbuat hızmetiniñ qayd etkenine köre, böyle ava Qırımda kün devamında üküm sürecektir.
«Afat topraqnı suvnen örte bile, eşik sebebi ola bile», – dep qoştı nazirlik.
Qurtarıcılar aydavcılarğa Keriç keçitiniñ işinde ola bilecek deñişmelerge diqqat etmege tevsiye ete.
Oktâbr 30-da «Deñiz müdirligi» şirketi furtunadan sebep Keriç parom keçitiniñ işi toqtatılğanını bildirdi.
Keriç boğazındaki parom keçiti Qırımnı Rusiye Federatsiyasınıñ Krasnodar ülkesi ile bağlağan yekâne naqliye bağı ola. Ukraina qanunlarına köre, Qırımğa Keriç keçitinden kirmek yasaqtır ve devlet sıñırını keçiş qaideleriniñ bozulması sayıla.
