«Qırım birdemligi» birleşmesi oktâbr 29-da Aqmescitte er ay olğanı kibi toplaşuv keçirdi, dep bildire Qırım.Aqiqat mühbiri.
Toplaşuvda Skype vastasınen iştirak etken «Qırım birdemliginiñ» koordinatorı Dilâver Memetov «Qırım birdemliginiñ» haber alanında bulunması müim olğanını qayd etip, ukrain matbuat vastalarını birleşmeniñ faaliyetini aydınlatmağa çağırdı.
«Bu mevzu Qırım.Aqiqattan ve «ATR» kanalından ğayrı başqa kimsege kerekmey sanki. Sayımız arta, amma farqlı matbuat vastaları buña diqqat etmey. Ukrain kütleviy haber vastalarını faaliyetimizni daa çoq aydınlatmağa çağıram», – dep qayd etti körüşüvde Dilâver Memetov.
Uquq qorçalayıcı «Qırım birdemliginiñ» faallerine farqlı yayınlarda iştirak etip faaliyetlerini aydınlatmağa teklif etti.
Aprel 9-da Aqyarda Qırım insan aqları bağ gruppası Qırımda Rusiye uquq qoruyıcıları yaqalağan musulmanlarnıñ körüşüvini teşkil etti. Mında qabaatlanğanlarnıñ advokatları da oldı. Körüşüvde çıqışta bulunğan advokat, Qırım insan aqları bağ gruppasınıñ azası Emil Kürbedinov bu kün Qırımda apiske alınğan musulmanlarnıñ qorantalarını birleştirecek meydançıq qurulğanını bildirdi.
Tezden «Qırım birdemligi» birleşmesi yalıñız «Hizb ut-Tahrir» teşkilâtı ile iş tutmasınen qabaatlanğanlarnıñ soy-soplarını degil de, Qırımnıñ diger siyasiy mabusları ve qaçırılğan ve ğayıp olğan insanlarnıñ ailelerini birleştirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
