Rusiye uquq qoruyıcıları «Hizb ut-Tahrir» teşkilâtı ile iş tutqanınen qabaatlanğan qırımtatarı Refat Alimov cuma künü, oktâbr 28-de, 25 yaşını toldurdı. Bu doğğan künü SİZOda keçe. Bunı faal Anna Bogaçeva Facebooktaki «Qırım birdemligi» gruppasında yazdı.
«Refat Alimovnıñ doğğan kününi hayırlaymız! Bizler tezden azat etilecek ve kelecek doğğan kününi qorantasınen beraber keçirir, dep ümüt etemiz», – dep yazdı Bogaçeva.
Bogaçeva hatırlattı ki, Alimov yarım yıldan berli Aqmescit SİZOsında yata ve taqiqatı devam ete.
«Onı «terrorit bir teşkilâtnıñ iştirakçisini kibi» qabaatlaylar, bu ise em oña, em sağlam fikirge zıt kele. Ümüt etemiz ki, adalet yeñer. Amma şimdiden ayta bilemiz, Refat quvet ve cesaretniñ saibi olaraq bütün sınavlardan lâyıq bir şekilde keçe, şimdiki vaqıtnıñ bir çoq insanı böyle degil», – dep ayttı Bogaçeva.
Qızıltaş qasabasınıñ sakini Refat Alimov 2016 senesi aprel ayında «Hizb ut-Tahrir» ile iş tutqanında şeklenilip yaqalanğan edi.
Aprel 12-de FSB Alimovğa qarşı cinaiy iş açtı, amma qorantasına ancaq aprel 23-de Refat apiske alınğan soñ haber etildi.
Rusiye uquq qoruyıcıları aprel 18-de Alimov oturğan evde tintüv keçirdi. Malümat taşıyıcıları, diniy filmler ile diskler tutıp alındı, özü ise Qırımdaki FSB idaresine alıp ketirildi. Al-azırda o Aqmescit SİZOsında yata.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
