Kreml kontrol etken Qırımnıñ milletlerara munasebetler ve sürgün olunğan grajdanlarnıñ işleri boyunca komiteti bildirdi ki, aqımdaki seneniñ soñuna qadar qırımlılarğa şahsiy qurucılıq içün 3390 topraq damartısı berilecek. Bunı komitetniñ matbuat hızmeti oktâbr 28-de bildire.
Bugünki künde eki biñ insan Aqmescit rayonınıñ Saraylı Qıyat (Mirnoye) köyünde şahsiy qurucılıq içün topraq aldı, dep bildire memurlar.
«Bugunde-bugün Milletlerara munasebetler komiteti Saraylı Qıyat köyündeki 900 topraq damartısınıñ birinci vesiqalarını bermege azır», – dep qayd etti Kreml kontrol etken komitet yolbaşçısı Zaur Smirnov.
Oktâbr ayında Kreml kontrol etken Qırım ükümetiniñ reisi Sergey Aksenov mesken fondnıñ şahsiyleştirilmesi içün mehanizmni «qısqa müddet içinde» azırlamağa avale etti. Berilgen malümatqa köre, Qırımda mesken inşaatlarnıñ vatandaşlarğa berüv yolları alâ daa belgilenmedi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
