Cuma künü, oktâbr 28-de, Aqmescitte Cuma-Caminiñ temeli qoyuldı. Merasimde Kreml kontrol etken Qırım ükümeti, parlamentiniñ vekilleri, em de şeer akimiyeti ve müftiylik iştirak ettiler, dep bildire «RİA Novosti Krım».
«Temeli qoyulmağa başladı. Soñki dört-beş ay devamında qazma işleri keçirildi, ve bugün Cuma-Caminiñ temeli peyda ola», – dep ayttı Qırımnıñ milletlerara munasebetler ve sürgün olunğan grajdanlarnıñ işleri boyunca komitetiniñ Rusiye yolbaşçısı Zaur Smirnov.
Qırımdaki Cuma-Cami qurucılığı Aqmescitte 2015 senesi sentâbr 25-de başlağan edi. Qurucılıq 3 yıl devam etecektir. Cami 3 ga meydanda yerleşip, ibadethaneden ğayrı, bir sıra diger binanı, şu cümleden memuriy inşaatlarnı da birleştirecektir. Umumen 4000 insan qızdırılacaqtır.
Cami şeerniñ cenübiy töpesinde, Aqmescitniñ suv anbarı civarında qurula. Leyhağa köre, cami eki qısımdan ibaret olacaq: 28 metr qubbeli esas bina (ölçüsi 37x37) ve iç azarı (abdesthaneli). Caminiñ dört minaresi olacaq, er biri 50 metrdir.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
