Link açıqlığı

30 oktâbr 2016 senesi, cumaertesi-bazar keçer gecesi saba saat 4-te Ukraina sakinleri saat aqreplerini bir saat artqa çevirmeli ediler. Bu aqta Ukraina Nazirler şurasınıñ fermanında aytıla.

Soñki yılları Ukraina ve Rusiyeniñ ğarbiy qısımı aynı vaqıtta yaşaylar. Qışta ise Kyiv ve Moskva arasında 1 saat farqı bar. Bunıñ sebebi – 2014 senesi Rusiyede saatlar soñ kere qış vaqıtına keçirilgen edi ve artıq deñiştirilmey.

Özleri «DNR» ve «LNR» olaraq ilân etken grıppalar ve Rusiye tarafından işğal etilgen Qırım da saatlarnı burmay. Bundan sebep bu regionlarda oktâbr 30 kününden başlap saatlar Kyivten bir saat ögde olacaq.

2011 senesi Ukraina Yuqarı Radası Ukrainada qış vaqıtınıñ lâğu etilmesi içün rey berdi. Lâkin soñra bu qarar red etildi, çünki siyasetçiler Ğarbiy Ukrain sakinleriniñ bildirgen narazılıqlarını köz ögüne aldı. Ayrıca, yerli sakinler ve deputatlar «yañı esaplav vucud ve joğrafiya esaplarına uymağanını» aytılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG