Qırımda 11 aliy oquv yurtu qızdırılmay, olardan beş – mektep, üçü ise tatilge çıqmağa mecbur oldı. Bunı oktâbr 28-de Kreml kontrol etken Qırımnıñ tasil, ilim ve gençlik naziri Natalya Gonçarova matbuat konferentsiyasında bildirdi.
«Kelecek afta bu mekteplerniñ talebeleri oquycaq. Bağçasaraydaki mektep, ümüt etemiz ki, bazarertesi künü sıcaq olacaq, o, merkeziy sistemağa bağlıdır. Eki mektepniñ qazan dairesi yaramay çalıştı. Şahsiy qızdıruv sisteması olğan mekteplerde er şey yerinde», – dep tekrarlay Gonçarovanıñ aytqanlarını «Sobıtiya Krıma» neşiri.
Bundan evel Qırımnıñ tasil, ilim ve gençlik naziriniñ muavini Natalya Jurba bildirdi ki, yarımadanıñ üç mektep talebeleri küz tatiline erte çıqtı.
Kreml kontrol etken Qırım ükümetiniñ matbuat hızmeti yarımada ealisi mesken evlerde ve içtimaiy yerlerde suvuq olğanından şikâyet ete, dep bildirgen edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
