Link açıqlığı

Ukraina prezidenti Petro Poroşenko ve Türkiye zenaatdaşı Recep Tayyip Erdoğan oktâbr 27-de kerçekleştirilgen telefon subetinde işğal olunğan Qırımda insan aqlarınıñ bozulmasını takbih ettiler. Bunı Ukraina prezidentiniñ matbuat hızmeti bildire.

«Prezident Erdoğan işğal etilgen yarımadada olıp keçken Rusiye parlament saylavlarınıñ neticelerini tanımağanını daa bir kere qayd etti», – dep aytıla beyanatta.

Ukraina ve Türkiye prezidentleri soñki yıl devamında muntazam sürette körüşe ve telefonda subetleşeler.

Sentâbr soñunda AQŞ-da bulunğan Erdoğan Poroşenko ile körüşkende şunı qayd etti, «Türkiye ileride de Ukrainağa mustaqilligi ve topraq bütünligini ğayrıdan tikleme meselesinde yardım kösterecektir». Erdoğannıñ aytqanına köre, Rusiye ile dialog yañıdan başlağan olsa da, Türkiye Qırım işğalini tanımay ve qırımtatar halqı aq-uquqlarınıñ bozulmasını takbih ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG