Qırımda Rusiye nezareti astındaki mahkeme «Sudaqlı dörtniñ işi» boyunca mahkeme toplaşuvında dört yigitni memuriy qanun bozıluvında qabaatlı olaraq tanıdı. Er birine 20 biñ ruble miqdarında para cezası belgilendi.
Bunı Facebookta qırımlı Lenora Dülber haber etti.
«Sudaqlı dört» – Ablâkimov Ablâkim, Enver Çavuş, Seitumerov Seitmamut ve Alim Muslâdinov memuriy qanun bozuvında qaabaatlı tanıldılar. Olardan er birine 20 biñ ruble miqdarında para cezası tainlendi», – dep aytıla Dülberniñ yazısında.
2016 senesi 18 mayıs künü Sudaqlı qırımtatar faalleri maşnalarda qara şeretli qırımtatar milliy bayraqlarınen yürüş keçtiler. Bu içün olarnı mesuliyetlikke celp etmege istediler. Sudaq şeer mahkemesi gençlerniñ areketlerinde iç bir qanun bozuvını körmedi.
Sudaqnıñ şimdiki politsiya yolbaşçısı böyle qararnen razı olmayıp, oña qarşı şikâyet etti.
Rusiye İçki işler nazirliginiñ vekilleri 18 mayıs 2016-da hatıra aktsiyasında iştirak etken aydavcılarnı kütleviy surette yaqalay edi.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler keçirilip başladı, adamlar diniy mensüpligine köre taqip etile, dep qayd ete Meclis temsilcileri ve uquq qoruyıcılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
