Link açıqlığı

Oktabr 27 cümaaqşamı Viyanada «Qırımda jurnalistika ve söz serbestligi» konferentsıyası ötkerildi.

Konferentsiyağa ukrain jurnalisti ve mediaeksperti Yüriy Lukanov, Qırımdan advokat Emil Kurbedinov ve jurnalist Yelena Lısenko teşrif buyurdılar.

Advokat Emil Kurbedinovnıñ Facebookta yazğan sözlerine köre, o ve onıñ meslekdeşleri «qanunsız taqip etüvler, Qırımdaki faallerge ve söz serbestligine qarşı küreş müiti» aqqında bildirdiler.

«Cinaiy işler ve başqa taqip etelüv areketlerden ğayrı, men cemaat faaleri aqqında da söz yürsettim. Adamlar özüni telükege atıp, kamera, telefon ve planşetlernen «silâlanıp», tintüv, apiske aluv ve mahkeme toplaşuvlarını çekip, yerli sakinlerden, advokatlardan intervyü alıp, internetke yükliyler», – dedi Kurbedinov.

Advokat ve zenatdaşları bildirdiler ki, olar izaatlarnen video-malümat ve maqalelerni özleri internetke yüklemel mecburlar.

Emil Kurbedinov Qırımdaki bu faallerge qarşı yañı basqılar yapılacağı beklenilgenini qayd etti.

«İnsan aqları bozulğan yerlerge, apiske alınuv, tintüv keçirilgen yerlerge kelgen mezkür faallerge, aveskâr muhbirlerge ve teşebbüs köstergen vatandaşlarğa qarşı, meselâ Bağçasaraydaki faallerniñ memuriy mesuliyetke çekilmesi kibi, yañı basqılar yapılacağını bekleymiz», – dedi Kurbedinov.

Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullanğanını istedi.

XS
SM
MD
LG