Avropa parlamenti oktâbr 27, cumaaqşamı künü Strasbourgta keçirilgen umumiy toplaşuvda rey çoqluğınen «Özek telükesizligi ve tarqatılmaması» rezolütsiyasını qabul etti.
Rezolütsiyada Avropa deputatları Rusiye tarafından özek silâsını qullanacağı aqqında qorqutuvlar seslendirilgeninen raatsız olğanlarını bildireler ve devletlerni atom silâsınıñ sayısını ve arbiy doktrinada atom quvetleriniñ emiyetini eksilmege çağıralar.
Avropa parlamenti ayrıca «Rusiye arbiy idmanlarında Poloniyağa qarşı böyle silânıñ qullanılmasını taqlit etkenine, Rusiye Qırımda özek silâsını yerleştirmege aqlı olğanı aqqında resmiy şahıslarnıñ beyanatlarına, Litvaniya ve Poloniyağa qomşu olğan Kaliningrad regionında özek raketalarını taşıp olğan İskander sistemalarınıñ açılmasına» diqqat ayırdı.
Deputatlar Qırımnıñ zapt etilmesini doğrudan-doğru «Ukraina devletine aiy olğan topraqlarınıñ işğal etilmesi» olaraq adlandırdılar.
«Rusiye ve AQŞ ya da İndistan ve Pakistan kibi özek silâsına saip çıqqan devletler arasında munasebetler kerginleşken vaqıtta, Rusiye özek silâsını qullanacağınen ya da onı Avropada daa çoq sayıda yerleştireceginen qorqutqan vaqıtta, AB telülesizligi saasında vaziyet ep ziyade qızıştırıla», – dep aytıla rezolütsiyada.
Avropa deputatları özekli devletlerni atom silâsınıñ sayısını azlaştırmağa, yerleştirilgen yerlerinden anbarlarğa saqlamağa ve arbiy doktrinada onıñ emiyetini eksiltmege çağırdı.
Rezolütsiyada qayd etilgenine köre, 2016 senesi yanvar ayında doquz memleket: AQŞ, Rusiye, Büyük Britaniya, Frenkistan, Çin, İndistan, Pakistan, İsrail ve Şimaliy Koreyada, cemi olaraq, aman-aman 15 400 dane özek silâsı bar edi.
İşğal etilgen Qırımda rus arbiyleri er zaman özek silâsınıñ qullanılması boyunca idmanlar keçire. Rusiye Mudafaa naziri Sergey Şoygu 27 iyülde Moskvada nazirlikniñ kollegiya toplaşuvında Qırımda tam yeterli sayıda rusiye ordusı yerleştirilgenini beyan etken edi.
Moskva işğal etilgen yarımadada arbiy nevbetçilikke C-400 «Triumf» ve «Pantsır-C» zenit-raketa komplekslerini yerleştirdi, Qara deñiz flotunı yañı gemilernen, uçaqlarnen ve tehnikanen teminlemege devam ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
