Zapt etilgen Qırımnı Rusieyege bağlı olğanını açıqtan köstermek maqsadınen Putin Qırımğa barıp keldi. Bunı «112 Ukraina» telekanalınıñ efirinde Ukraina Tışqı işler nazırliginiñ temsilcisi Maryana Betsa beyan etti.
«Biz öyle faktlarnı qayd etemiz, olarnı soñ halqara mahkeme işlerinde qullanırmız, Ukraina ende öyle halqara mahkeme instantsıyalarında teşebbüs köstere. Öyle ziyaretler Ukrain mustaqılligini, halqara uquq ve BM Teşkilâtınıñ qanınlarını boza», – dedi Betsa.
Rusiye prezidettiniñ ziyaretinden maqsat – «episiniñ közü ögünde Qırım Rusiyege bağlı olğanını köstermek istegi, albu ki bunı kimse qabul etmey», – qoştı spiker.
Ukraina Tışqı işler nazırligi Putinniñ Qırımğa barıp kelgenine qarşı çıqıp, Rusiyege itiraz bildirdi.
Rusiye prezidendi Vladimir Putin oktâbr 26, çarşenbe künü işğal etilgen Qırımğa kelip «Areket Forumı. Qırım» Umumrusiye milliy front forumına qoşuldı.
Bundan evel Vladimir Putin ve Dmitriy Medvedev zapt etilgen yarımadada sentâbr 15 künü olğan ediler. O vaqıt Keriçte «ülkeniñ cenübi ile naqliyat sistema meselesi» boyunca Rusiye Devlet Şurasınıñ prezidium toplaşuvı olıp keçken edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
