Qırım uquq qorçalayıcı gruppası çarşenbe künü, oktâbr 26-da, işğal altındaki yarımadada 2016 senesi sentâbr ayınıñ insan aqları vaziyetine dair monitoring neticelerini taqdim etti.
Mında azatlıqnı bozğan yaqalav ve tintüvler, «Kolomiyetsniñ davası», «fevral 26 davası», «Hizb ut-Tahrir davası», «ukrain diversantlarınıñ davası» qayd etile.
Bunıñnen beraber, söz ve ifade serbestligi, barışıq toplaşuv ve birleşmelerniñ azatlığı bozula, dep qayd etildi. Mında «İlmi Ümerovnıñ davası» kirdi.
Qırım uquq qorçalayıcı gruppası yarımadada insan aqlarına riayet etüv ve qorçalanmasına yardım ete, çeşit problemlerge diqqatnı celp etmege ve Qırımda insan aqlarını qorçalayıcaq farqlı yollarnı qıdıra.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
