Bir yıl içinde işğal etilgen Qırımda orta aylıq 3 biñ rublege artıp, 2015 senesiniñ neticelerine köre 14-ğa arttı. Bunı Kreml kontrol etken Qırım isaiyat devlet hızmetiniñ matbuat hızmeti bildire.
Hızmetniñ malümatına köre, sentâbr ayına qırımlılarnıñ aylığı 24 763 rubleni teşkil etti.
«Eñ çoq Qırımda maliye saasınıñ hadimleri qazana – 54,7 biñ ruble, faydalı qazımtılarnı çıqarğanlar – 46,5 biñ, memurlar – 35,1 biñ, musafirhane ve qavehanelerniñ hadimleri – 30,7 biñ. Eñ az balıq tutqanlar – 11,8 biñ ve köy hocalığınen oğraşqanlar qazana – 19,6 biñ ruble», – dep qayd ete matbuat hızmeti.
Hızmetniñ bildirgenine köre, ocanıñ orta maaşı 16,4 biñ ruble, tibbiyet saasında çalışqanlarnıñ ise 23,5 biñ ruble ola.
Rusiye Cemaat palatasınıñ vekili Eduard Gavrilov resmiy isaiyat tibbiyet saasında çalışqanlarnıñ aylıqlarından pek farqlaşa, dep aytqan edi. Gavrilovnıñ bildirgenine köre, Qırım rayonlarında feldşerniñ maaşı 15-18 biñ ruble, sanitarnıñ ise 7 biñ ola. Ekim, Merkeziy rayon hastahanesi ya da poliklinika olğanına köre, 20 biñ civarında aylıq ala.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
