Ukrainadaki Avropa Birligi Temsilciliginiñ reberi Hugues Mingarelli Rusiyeni jurnalist Nikolay Semena ve qırımtatar jurnalistleriniñ taqip etilmesini toqtatmağa çağırdı. Bunı o Kyivdeki «Ukrainada jurnalistlerniñ telükesizligi. Qanunsızlıqnıñ soñu» halqara konferentsiyasında bildirdi, dep haber ete UNIAN.
«Qırımda ifade serbestliginiñ bozulması bizni pek qasevetlendire. Jurnalist Nikolay Semena Rusiye topraq bütünligini bozmağa çağırdı dep, onı ev apsinde tutalar. Şübesiz, bu bir şaqa kibi», – dep ayttı Mingarelli.
Onıñ bildirgenine köre, qırımtatar jurnalistleri işğal etilgen Qırımda taqip etile.
«Olar (qırımtatarlar – QA) ayrı bir nişan sayıla. Olarnıñ evlerinde tintüvler keçirilgenini bilemiz. Bunı toqtatmaq kerek, bunı toqtatmaq içün elimizden kelgenini yapmaq kerekmiz», – dep qoştı Mingarelli.
OSCE kütleviy haber vastalarınıñ serbestligi vekili Dunja Mijatović kün tertibindeki eñ müim meseleler ukrain jurnalistleri Roman Suşçenko ve Nikolay Semena olğanını qayd etken edi.
Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
