İşğal altındaki Aqyardaki Hrustalev soqağınıñ sakinleri narazılıq aktsiyasını keçirip, Rusiye Federal havfsızlıq hızmetiniñ (FSB) hadimleri içün qurulacaq ev meydançığınıñ yolunı qapattılar. Bunı Qırım.Aqiqat mühbiri bildire.
Ev qurucılığı aqqında 2015 senesi dekabr ayında belli oldı. Ev qurulacaq yer cemaat ile muzakere etilmedi. Bundan evel bu yerde bala meydançığını qurmağa planlaştırıla edi, dep bildirdi mühbir.
Sakinler bildirgenine köre, qurucılıq meydançığı çoq qatlı evlerniñ yanındaki topraqnıñ bir qısmını aldı.
Sakinlerniñ aytqanına köre, soqaqtan raat ve telükesiz keçmek imkânsız, tar yolda er daim qurucılıq tehnikası bar.
Oktâbr 26-da piket başlağan soñ politsiya hadimleri keldi. Qurucılıq malzemeleri tolu bir qaç yük maşinası aylanıp ketmege mecbur oldı.
Moskva tayin etken Aqyar akimiyeti vaziyetni izaatlamay.
Kreml kontrol etken işğal etilgen Qırım parlamenti sentâbr 21-de devlet ya da belediye mülkine ait köy hocalığı topraqlarınıñ satılması ve kirağa berilmesiniñ toqtatılmasını lâğu etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
