Link açıqlığı

Kremlge bağlı olğan Aqmescit şeer yolbaşçısı Gennadiy Baharev oktâbr 25 künü keçirilgen toplaşuvda ruhsetsiz ticaret noqtaları şeher memuriyetiniñ nezaretinde bulunğanını ayttı. İzinsiz çalışqan tek-tek ticaretçiler ise kün devamında toqtatıla. Bunı Aqmescitniñ rus memuriyetiniñ matbuat-hızmeti bildire.

«Ruhsetsiz ticaret noqtaları büyük sayıda yedi yerde bar, bu yerler şeer memuriyetiniñ vekâletli hızmeti, politsiya hadimleri ve qoruv müessisesi tarafından daima nezaret etile. Ayrı noqtalar kün devamında yoq etile. Biz satıcılarğa şeerniñ resmiy bazarlarına keçmek imkânlarnı açıqlaymız», – dedi Baharev.

Bildirüvde şeer bazarlarınıñ kenarlarında yüzge yaqın obyekt yoq etilecegi haber etile. «Böyle obyektlerni ögrengen mahsus komissiyasınıñ işi sayesinde» olarnıñ sayısı artmaq mümkün.

Baharevniñ sözlerine köre, aynı zamanda ruhsetsiz temelli qurucılıqlarnıñ da yıqtırılması aqqında işler mahkemede baqıla.

Bundan evel, Kremlge bağlı olğan Qırım akimiyetiniñ başı Sergey Aksönov ruhsetsiz ticaret noqtaları 2017 senesiniñ birinci yarısında bütünlet yoq etileceklerini vade etken edi.

Keçken sene yazda Kozlova soqağında bazarnı potitsiya sarıp alğan edi, o yerde izinsiz ticaret noqtaları yıqtırıla edi. Açuvlanğan satıcılar Nazirler şurasına bardılar, anda olarnı başqa iş yerleri berileceginde işandırğan ediler.

XS
SM
MD
LG