Suv astında çalışqan atiqiyatçılar Qara deñizniñ tübünde qırqtan ziyade gemi taptılar. Olar Bizans ve Osmanlı devirlerine ait olasalar da, yahşı alda saqlanılğanlar.
Radio Svoboda, britaniyalı «Daily Mail» gazetine atıf etip, haber ete ki, Bulğaristan yalısında Qara deñiz astında 1800 metr terenlikte eñ zemaneviy 3D çekimler vastasınen harita taqiqatları alıp barılğan vaqıtta gemiler tapıldı. Olar, ne oksigen, ne de ışıq tüşmegen «cansız alanda» bulunğanları içün, pek yahşı saqlanılğanlar.
Atiqiyatçılar çoqtan berli o yerlerde gemiler mezarı olğanını tahminley ediler. Ekspeditsiya yolbaşçısı, Southampton universitetiniñ professorı John Adams dey ki, tapılğan qalımtılar Qara deñiz yalısında eski zamanlardaki yaşayış aqqında çoq bilgi bermek mumkünler.
Adamsnıñ sözlerine köre, ekspeditsiyanıñ maqsadı – geofizik taqiqatlar vastasnen, ne zaman ve ne qadar qısqa muddet içinde suv seviyesi köterilgen edi, ve insanlanıñ yaşayışına bu nasıl tesir etken edi.
