Ukraina halq vekili Mustafa Cemilevniñ oğlu – Hayserni rus apishanesinden çıqarmağa azırlanalar. Bunı Ukrinformğa mabusnıñ advokatı Nikolay Polozov bildirdi.
«Hayser şimdi lagerde buluna. Lâkin, tahmin etmege mumkün ki, noyabrniñ soñunda azat etilmezden ögüne onı izolatörge oturtmaq mumkünler. Koloniyada böyle adet bar. Mabuslarnı yibemezden ögüne, çoqusı allarda, etraf müitten ayıralar. Bese-belli, başqa mabuslardan maümat alıp, serberstliktekilerge haber yetkizmesinler dep», –söyledi Polozov.
Neşirde qayd eteler ki, Hayser Cemilev Polozovqa onıñ analizleri alınğanını ayttı. Advokatnıñ fikirince, bu azat etmek içün azırlıqlar alıo barılğanına işaret etedir. Çünki koloniyadan yiberilecekler içün tibbiy qayıtlar berile.
Polozov oktâbr 27, cumaaqşamı künü mahkeme toplaşuvında şart ile vaqıttan evel azat etilüvniñ red etilmesine qarşı şikâyet itarazı baqılacağını hatırlattı.
«Bellesem, bu toplaşuvnıñ neticesi evelden bllidir – red etecekler. Em de, zaten, Hayser Cemilevniñ adiy yiberilmesine qadar bir ay vaqıt qalacaq», – dedi Polozov.
İyün 23-te Ukraina Adliye nazirliginde bildirdiler ki, müessise İnsan aqları boyunca Avropa mahkemesinde Hayser Cemilevniñ adliyecileri bergen davağa qoşuldı. 2015 senesi iyül 10-da İnsan aqları boyunca Avropa mahkemesi Hayser Cemilevniñ işi boyunca qarar çıqarıp, onı SİZO-dan azat etmege talap etti, bunen beraber, Rusiye Federatsiyasını ukrain kişiniñ sağlığına zarar ketire bilecek areketlerni yapmamağa mecbur etti.
Hayser Cemilevni 2013 senesi mayıs 27-de onıñ Bağçasaraydaki evinde yaqalap, o yerde 44 yaşındaki Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.
Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.
Hayser Cemilev 10 sanlı Astrahan apishanesinde buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
