Qırımtatar tamırlı ukrain yırcısı Jamala «Fokus» mecmuasınıñ «Ukrainanıñ eñ itibarlı 100 qadını» cedvelinde 75-inci yerni qazandı. Bunı yırcı Facebookta bildirdi.
Cedvelniñ ilk üç yerini Ukraina milliy bankınıñ yolbaşçısı Valeriya Gontareva, Ukraina Yuqarı Radası reisiniñ birinci muavini İrina Geraşçenko ve «Batkivşçına» firqasınıñ lideri Yuliya Timoşenko aldılar.
Sentâbr 21-de Jamala «1944» yırınıñ resmiy klipini taqdim etti. Yırcığa ğalebe qazanmağa yardım etken yırnıñ videosını başta Kyivde kördiler.
Jamala mayıs 15-ne keçer gecesi İsveçiyanıñ paytahtı Stokgolmde «Eurovision-2016» yır yarışında ğalip çıqtı. Qırımlı qırımtatarlarnıñ sürgünligini añlatqan «1944» yırını icra etti. Yarış qaidelerine köre, 2017 senesi Ukraina «Yevrovideniye» yarışını qabul etecek. «Eurovision-2017» yarışı Kyivde keçirilecektir.
