Kreml kontrol etken Qırım yuqarı mahkemesinde Qırımtatar Milliy Meclisiniñ reis muavini Ahtem Çiygoznıñ işinde daa bir oturış soñuna keldi. Bunı Rusiye advokatı Nikolay Polozov Twitterde bildirdi.
Advokatnıñ aytqanına köre, üyleden evel mahkeme Kyivge «ketken» «zarar körgen kişini» sorğuğa çekti.
Toplaşuv tekrar başlağan soñ mahkeme qabaat şaatlarını sorğuğa çekmege başladı.
Polozovnıñ bildirgenine köre, mahkeme Kolesnikov Andrey Viktoroviçni – Qırım parlamenti işleriniñ idaresiniñ muavinini – sorğuğa çekti.
«Qabaatnıñ nevbetteki şaatı – Fil Nikolay Anatolyeviç. 2014 senesi fevral 26-da o ukrain militsiyasınıñ hadimi edi, şimdi Rusiye İçki işler nazirliginde çalışa», – dep qoştı Polozov.
Advokatnıñ aytqanına köre, nevbetteki oturış oktâbr 25-de keçirilecektir.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
