Link açıqlığı

Ukraina Tışqı işler nazirligi Suriyeniñ Qırımnen bağlı beyanatlarından sebep vekilini çağırdı


TİN matbuat kâtibi Maryana Betsa

Ukraina Tışqı işler nazirligine Suriyeniñ parlament spikeriniñ işğal altındaki Qırımnıñ Rusiyege bağlı olmasına dair beyanatından sebep bu memleketniñ vekili çağırıldı. Bunı Ukraina TİN matbuat kâtibi Maryana Betsanıñ aytqanlarına esaslanıp Radio Svoboda bildire.

«Oktâbr 20-de Tışqı işler nazirligi Ukrainada Suriye işlerinden vaqtınca mesüliyetli olğanını çağırıp, narazılıq bildirdik ve bu uquqqa zıt bir şey olğanını, Suriye tarafından dostluqnı bozğan bir adım olğanından açuvlanğanımıznı aydınlattıq», – dedi o.

Betsanıñ qayd etkenine köre, Qırım halqara uquq esasında Ukrainanıñ bir parçası olıp qala, bunı 2014 senesi mart ayında qabul etilgen Birleşken Milletler Teşkilâtı Baş assambleyasınıñ Ukraina topraq bütünligi aqqında rezolütsiyası da tasdıqlay.

Suriye Rusiye 2014 senesi işğal etken Qırımnı Rusiyeniñ «ayırılmaz bir parçası» olaraq tanıdı, bunı Suriye parlamentiniñ reisi Hadiya Abbas keçken afta Sputnik Rusiye devlet agentligine bildirdi.

Rusiye Suriye akimiyetiniñ esas siyasiy ve arbiy ortağı ola.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG