Link açıqlığı

Oktâbr 30, bazar künü, siyasiy basqılar qurbanlarınıñ hatıra kününde Rusiyede faaller «Kremlinniñ ukrain siyasiy mabusları» ile birdemlik aktsiyasını keçirecekler. Olar er istegen kişini mektüp yazuv aktsiyasına davet ettiler. Aktsiya Let My People Go kampaniyası çerçivesinde keçirile.

Teşkilâtçılarnıñ sözlerine köre, şimdiki vaqıtta 29 ukrain vatandaşı Let My People Go cedveline kirsetilgen.

«Bu belli kino rejissöru Oleg Sentsov, Aleksandr Kolçenko i Oleksey Çirniy. Bu Viktor Şur, Valentin Vıgovskiy, Sergey Litvinov, Nikolay Karpük, Stanislav Klih, Aleksandr Kostenko ve Andrey Kolomiyets. Qırımtatarları: babası – Mustafa Cemilev olğanı içün mabüs olğan Hayser Cemilev. Bu Hizb ut-Tahrir işiniñ şahısları Ruslan Zeytullayev, Nuri Primov, Ferat Sayfullayev, Rustem Vaitov, Enver Bekirov, Emir-Üseyn Kuku, Vadim Siruk, Müslim Aliyev, Arsen Cepparov, Refat Alimov, Enver Mamutov, Remzi Memetov, Zevri Abseitov, Rustem Albitarov. Ve daa Ahtem Çiygoz, Mustafa Degermenci ve Ali Asanov», – dep aytıla faallerniñ bildirüvinde.

Mektüplerni yollamaq içün qaideler, menziller ve hatıra kününiñ tarihını letmypeoplego.org.ua sitesinde tapmağa mumkün.

Ukrain tarafdarları ve qırımtatar faalleri Qırımda Rusiye işğalinden soñ sıq-sıq taqip etileler. Bunı defalarca uquq qoruyıcılar tasdiqlay ediler. Olar Kremlinni insan aqlarınıñ bozulmasını toqtatmağa çağıralar. Lâkin Moskva ve Qırımdaki rus akimiyeti represiyallarnı red ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG