«İnsan aqları qoruyıcıları olaraq biz Uquq qorçalayıcı alan merkeziniñ koordinatorı Aleksandra Krılenkova ile Boğurçada oktâbr 12 künü yaqalanğan Rustem İsmailovnıñ ailesiniziyaret ettik. Rustemniñ ömür arqadaşı – Fatma ile subetleşip, vaziyetini ögrendik, bilgi ve tavsiye berdik», – dep bildirdi Qırım.Aqiqatqa Qırım insan aqları bağ gruppasınıñ koordinatorı Abdureşit Cepparov.
İsmailovlar ailesinde üç evlât: qızları Hatice 7 yaşında, oğulları Fatih – 6 ve Halid – 2,5 yaşlarında.
Uquq qorçalayıcılarınıñ Qırım.Aqiqatnen paylâşqan malümatlarına köre, oktâbr 12 künü saba saat altıda Fatma ve Rustem saba namazını qılmağa azırlanğanda qapını sesli urdılar. Endi yuqudan uyanğan ömür arqadaşlar daa urbalarını deñiştirmege yetiştirmediler, evlerine, qapını qırıp, rus silâlı quvetler vekilleri kirdi. Rustem bir şey aytmağa yetiştirmedi, onı urup ellerini bağladılar. Birazdan o uquq qoruyıcılarğa müsülman erkegi de başqalarnıñ ögünde kiyinmeyip bulunmaq mumkün olğmağanını añlatıp, kinmege razılıq aldı. Soñra onıñ qollarını kene bağladılar.
Uquq qoruyıcılardan biri, bağırıp, evde olğan bütün telefonlarnı ögüne ketirip qoymağa talap etti. İsmailovlarda kün evelsi müsafirlikte olıp telefonını unutıp ketken qomşunıñ da telefonını aldı. Onıñ içün olğan vaziyet aqqında iç bir kimsege haber etmege çare olmadı.
Balalar da seslerden birden uyandılar. Büyük qızları qorqqanından qaltırap başladı
Balalar da seslerden birden uyandılar. Büyük qızları qorqqanından qaltırap başladı.
Taqımnıñ başı özüni tanıttı, o Cumhuriyet ve Aqyar FSB idaresiniñ taqiqat bölüginiñ taqiqatçısı Aleksandr Lavrov eken. Onnen beraber 12 kişi bar edi, olardan yarısı üzleri maskelernen gizley edi.
Silâlı quvetler vekilleri özüni sert alıp bara edi. Ayaqqap çıqarmadılar. Oktâbr 11 tarihı ile tintüv aqqında qararını kösterdiler, amma onda hata bar edi, çünki vesiqada evniñ saibi olaraq Rustem İsmailov keçe edi, albu ki vesiqalarğa köre evniñ kerçek saibi onıñ babası ola.
Tintüvni diqqatnen keçirdiler, bütün kâğıtlarnı baqıp çıqa ediler. Universitetten qalğan Fatmanıñ defterinde himiya formulalarını körüp, bunıñ ne olğanını soraştırıp başladılar. Fatma, TMU diplomını körsetip, himiya ocası olğanını añlatqan soñ olar biraz tınçlandı.
«Silâlı quvetler vekilleri bütün evni qarmalap çıqtılar. Rustemniñ ağası, Krasnodarda işlerini yürsetip, emanet olaraq 13 biñ dollar qaldırğan edi, onı da aldılar», – tarif etti Fatma.
Uquq qoruyıcılar çoq sualler bere edi, ayrıca olarnı Rustemniñ hacılığı meraqlandıra edi. Rusiye Anayasasınıñ 51 maddesine esaslanıp, ömür arqadaşlar uquq qoruyıcılarğa cevap bermediler. Ondan da ğayrı olar tintüvniñ protokolını da imzalamağa red ettiler. Rustem imzalaq içün protokolğa denişmelerniñ kirsetilmesini şart olaraq qoydı, amma olar buña razı olmadılar.
Protokolnıñ kopiyasını tek Fatmanıñ talaplarından soñ qaldırdılar. Rustemni alıp ketler.
Rustemni o künü yaqalanğan diger dört müsülmannen beraber Rusiyede yasaq etilgen ve terroristik sayılğan «Hizb ut-Tahrir» teşkilâtına bağlı olğanlarında qabaatladılar.
Öz aqayını Fatma müsbet taraftan tasvirley. Rustemde aliy ekonomik tasili bar. Çoq balalı aileni baqmaq içün soñki zamanları qurucılıqta çalışqan.
Aqayımı terrorizmde qabaatlağanlarınen biz iç te razı degilmiz. Qorantamıznı bütün qomşular ve çoq insan tanıy. Kimden sorasañız, er kez bizim ailemiz namuslı biz aile olğanını aytar
«Aqayımı terrorizmde qabaatlağanlarınen biz iç te razı degilmiz. Bizim qorantamıznı bütün qomşular ve çoq insan tanıy. Kimden sorasañız, er kez bizim ailemiz namuslı biz aile olğanını aytar. Bizde balalarımız öse. Kimseden saqlanmadıq. Olarnıñ qabaatlavları – aqsız. Men susmacam. Bu qabaatlavlar aqsız olğanından ğayrı, qanunğa da ters keleler», – dey Fatma.
Birazdan silâlı quvetler vekilleri Qarasubazarda yaşağan Rustemniñ ana-babasınıñ evine de kelip tintüv keçirdiler.
Siyasiy mabuslarnıñ soy-soplarını birleştirgen «Qırım birdemligi» teşkilâtınıñ temsilcileri qorantanı endi ziyaret ettilev, olarnı da qoşulmağa çağırdılar.
