«Bizim balalar» cemaat areketi 12 oktâbrde apis etilgen Emil Cemadenovnıñ yañı doğğan qızına vasiyliy etecek.
Bunı Facebookta Qırımlı jurnalist Lilâ Bucurova bildirdi.
«Bizim balalar» cemaat teşebbüsiniñ vesayetinde endi 67 bala bar. Üç balanıñ babası, oktâbr 12 künü apis etilgen Emil Cemadenovnıñ daa bir qızı doğuldı. O, bir şeyge baqmadan, bahtlı olıp össün. Onıñ ana-babası ise bilsin: olarnıñ balları – BİZİM BALALAR, ve, babaları yanlarında olmağance, BİZİM HALQIMIZ olarnı öz qayğısınen qaldırmaz», – yazdı Bucurova.
12 oktâbrde Mamaq qasabasında apis etilgen Emil Cemadenovnıñ oktâbr 21 künü qızı doğuldı.
Oktâbr 12-de Qırımda beş musulman qorantasınıñ evinde tintüv keçirildi. Beş qırımtatarı Rusiyede yasaq etilgen «Hizb ut-Tahrir» teşkilâtında iştirak etkenleri qabaatınen yaqalandı: Rustem İsmailov, Abdullayev Uzair, Abdullayev Teymur, Cemadinov Emil, Saledinov Ayder.
«Bizim balalar» leyhası bu sene musulmanlar içün muqaddes Ramazan ayında başlatıldı. Leyha teşebbüsçisi belli Qırım mühbiri Lilâ Bucurova oldı. Bunıñ esas maqsadı – Qırım siyasiy mabusları ve ğayıp olğan ya da qaçırılğan qırımtatarlarnıñ qorantaları balalarına yardım etmektir. «Bizim balalar» birleşmesiniñ Şurası teşkil etildi, onıñ içine lâqayt olmağan ve itibarlı adamlar kirdi, konkret icracılar belgilendi, olar malümatnı toplay ve tertipke ketire, paranı toplay ve muhtaclarğa teslim ete. Leyha tek para yardımını degil de, çeşit yardım şeklini qabul ete: para, urba ve oyuncaqlar, balalar içün raatlıq ve tedaviylenüvniñ teşkil etilmesi, ruhiy reabilitatsiya, mabuslarnıñ qorantalarına hocalıq boyunca yardım.
