Link açıqlığı

Aqmescitte oktâbr 21, cuma künü «Fes» art-merkezinde qırımlı tarihçi, yazıcı ve TV alıp barıcısı Oleksa Gayvoronskiyniñ «Qırım Yurtu» kitabı taqdim etildi. Bunı Facebookta «Bizim balalar» birleşmesiniñ Şura azası Elzara İslâmova bildirdi.

«Bügün «Fes» Art-merkezinde sıcaq, aman-aman aile müitinde Oleksa Gayvoronskiyniñ «Qırım Yurtu» kitabınıñ taqdim merasimi ötkerildi. Bu ğayet meraqlı, çoq renkli resimlernen yaraştırılğan kitap, qırımtatarlar ve Altın Ordu ve Qırım Hanlığınıñ devirinen meraqlanğan er biri içün taze ava yutumı kibidir», – yazdı İslâmova.

«Qırım Yurtu» kitabınıñ müellifi Oleksa Gayvoronskiy Facebookta yazdı ki, kitapnıñ taqdim merasimini o «umumiy ev ile birleştirilgen köydeşlerniñ körüşüvine» beñzetti.

«Bügün «Qırım Yurtu» dünya yüzüni körgeni, daa ziyade, köydeşler körüsüvini hatırlattı: umumiy ev ve umumiy taqdir ile birleştirilgen insanlarnıñ büyük, «aileviy», sıcaq bayramı. Bizim vaziyetimizde böyle bir umumiy ev ve taqdir bizim «Qırım yurtumız» oldı – bu dünyada daa bizim artımızda qalğan soñki diyar. Bizim başqa baracaq yerimiz yoq, eñ bozğun avada bile. Atta Mars avası olsa da», – yaza tarihçı.

Kitapnıñ taqdim merasimine Qırımtatar Milliy Meclis reisiniñ muavini İlmi Umerov onıñ qızı Ayşe Umerova keldiler.

«Oleksanı bilip ve onıñ bütün evelki kitaplarını oqup, bu da – nevbetteki şaheser olğanında iç te şübelenmeyim. Çünki onıñ er bir kitabı – bu kerçek Qırım tarihınıñ boşluqlarını toldurmaq içün ğayet emiyetli olğan ve ağır yapılğan iştir», – yazdı Umerova.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG