İşğal olunğan Qırım bir künge ışıqsıq qalmaq mumkün. Bu Bağçasaray idaresine yollanılğan vesiqada bildirile.
Energetiklerniñ sözlerine köre, oktâbr 22-23 künleri devamında qomşu Rusiyeden Qırımğa keçirilgen energo köpürde tamir işleri keçirilecek. Neticede oktâbr 22 künü saat 00-00 – oktâbr 23 saat 24-00 arasında Qırım energetik sisteması bütünley söndürülmek mumkün.
«22.10.2016 saat 00.00 ve 23.10.2016 saat 24.00 arasında tamir işlerine 1 SŞ 220 kV PS 500 Taman çıqarılcaq ve bütün birleştirmeler 2 SŞ 220 kV ile çalışacaqlar, 1 SŞ 220 kV PS 500 Taman ağında lastik bölücileriniñ direkleri doğurultacaq. 2 SŞ 220 kV PS 500 Taman ağında qazaiy söndürüv olsa, enegetik ağ köpüriniñ bütün KVL 220 kV söndürülecek ve Qırım energetik sisteması ayırılacaq», – dep aytıla bildirüvde.
Kremlin taradından tainlengen Qırım akimiyetiniñ yolbaşçısı Sergey Aksönov oktâbr 18, Salı künü yarımada «qışnı söndürüvlersiz keçirmek içün yeterli kölemde elektrik» alğanını beyan etken edi. Ve anormal suvuqlar vaqıtında «qısqa söndürüvler» ola bilecegini de qoşqan edi.
2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
