Link açıqlığı

Kreml kontrol etken Bağçasaray rayonı mahkemesinde oktâbr 21-de Qırımtatar Milliy Meclisiniñ azası Zeynur Yakubovğa nisbeten tizilgen memuriy protokol baqıldı.

Bunı Meclis azası Emine Avamileva bildirdi.

Avamilevanıñ video beyanatını Meclis reisiniñ birinci muavini Nariman celâl Facebook saifesinde derc etti. Avamilevanıñ aytqanına köre, mahkemeci Skisov işni bir özü baqtı.

«Yakubov Zeynur ve onıñ vekili olaraq menim bir qaç muracaatı qabul etildi», – dep ayttı Avamileva.

Avamilevanıñ bildirgenine köre, Zeynur Yakubovğa memuriy cinayet vesiqasınıñ kopiyası berilmegeninden ve iş malümatları ile tanış etmegeninden sebep iş baqılmasını qaldırmağa muracaat etildi.

«Mahkeme işbu muracaatnı qabul etip, mahkeme oturışını oktâbr 26-na qaldırdı», – dep qoştı o.

Bundan evel Nariman Celâl Meclisniñ altı azasına cuma künü, sentâbr 30-da, memuriy cinayet işlemesine dair protokollar berilgenini bildirgen edi.

Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı ve esirlerni azat etmege çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG