Sudaqta oktâbr 21-de gece belgisiz insanlar şeer bağçasındaki Lenin abidesini yıqtı. Parça-parça olğan abide fotoresimlerini ve videolarını şeer sakinleri içtimaiy ağlarda derc ete.
Krıminform Kreml kontrol etken Sudaq memuriyeti yolbaşçısınıñ matbuat kâtibi İrina Dubrovskayanıñ malümatına esaslanıp bildire ki, adise uquq qoruyıcı organlar tarafından taqiq etile.
«Al-azırda uquq qoruyıcı organlar yaramazlıq areketlerinden sebep taqiqat tedbirlerini keçire. Sudaqlılar içün şeer bağçasındaki Lenin eykeli – sovetler zamanında şeer inkişafı tarihınıñ bir timsalidir», – dep qayd etti Dubrovskaya.
Sudaq memuriyetiniñ yolbaşçısı Vladimir Serov abideni ğayrıdan tiklemege vade etti, dep bildire Qırım neşiri.
«Eminim, qabaatlılar tapılır ve ceza çekerler. Abideni ise biz ğayrıdan tiklermiz», – dep ayttı Serov.
Qırım uquq qoruyıcıları bunıñnen bağlı bir de bir izaat bermedi.
«Qırım rus cemiyetleri kongressi» cemaat teşkilâtınıñ reisi, Rusiye kontrol etken Qırım parlamentiniñ deputatı Sergey Şuvaynikov Qırımda Rusiye prezidenti Vladimir Putinniñ eykeli tiklenmesine para toplağanını bildirgen edi.
