Link açıqlığı

«Krım-SOS» Kyivdeki Rusiye elçihanesi yanında Qırımda qaçırılğanlarnıñ hatırasına aktsiya keçirilecegini ilân ete


Arhiv fotoresimi, Kyivdeki Rusiye elçihanesi yanında Qırımda ğayıp olğanlarğa qoltutuv aktsiyası

Salı künü, oktâbr 25-de, Kyivdeki Rusiye elçihanesiniñ binası yanında «Krım-SOS» cemaat teşebbüsi işğal etilgen Qırımda ğayıp olğan insanlarğa qoltutmaq maqsadınen aktsiya keçirecek ola.

Aktsiyada Rusiye akimiyetine «Ervin İbragimov ve Qırımda ğayıp olğan diger insanlar qayda?» sualinen muracaat etecek olalar. Bundan ğayrı, Ervin İbragimovnıñ anası Ukraina prezidentine oğlunı tapmaq ve azat etmek içün Poroşenkodan ğayret qoşmasını rica etkenini ifadelegen mektübini seslendirecekler.

Dünya qırımtatar kongressi icra şurasınıñ azası Ervin İbragimov 2016 senesi mayıs 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Rusiyege boysunğan sabıq Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.

XS
SM
MD
LG