Qırımtatar Milliy Meclis reisiniñ muavini İlmi Umerovğa FSB-de ötkerilgen sorğu devamında tanış olmaq içün lingvistik ve mahkeme-psihiatrik ekspertizalarınıñ neticeleri kösterildi. Bunı İlmi Umerov oktâbr 20, cumaaqşamı künü Facebookta bildirdi.
«Advokatlarnen beraber FSB taqiqatçısında oldım. Bizlerni birden eki ekspertizanıñ neticeleri ile tanış ettiler: lingvistik ve mahkeme-psihiatrik. Ekisiniñ de neticeleri bizim beklegenimiz kibi oldı. Lingvistik teşkerüvniñ neticesine köre, menim 19 martta ATR-de yapqan çıqışımda Rusiyeniñ territorial bütünligini bozmaq çağıruvlarım bar edi. Ekincisi, psihiatrik teşkerüv menim ruhiy hastalıqlarım olmağanını ayta. Yañı bir şey yoq», – bildirdi İlmi Umerov.
Qırımdaki advokat Emil Kurbedinovnıñ sözlerine köre, lingvistik ekspertizanıñ neticesine İlmi Umerovnıñ «faydasına degil». Bunı Kurbedinov 20 oktâbrde aqşam Facenookta yazdı.
«Ekspert (FSB hadimi) eñ «qorqunçlı» laf olaraq İlmi ağanıñ qırımtatar cumhuriyeti aqqında aytqan sözlerini tanıdı! Bir de bir kopiyalarnı taqiqatçı bermege razı olmadı», – qayd etti advokat.
Oktâbr 10 künü Qırımtatar Milliy Meclis reisiniñ muavini İlmi Umerov degen edi ki, o mecburiy ekspertizadan keçip klinikadan çıqqan soñ, işğal etilgen Qırımda Rusiye silâlı quvetlerniñ vekilleri onnen bağlanmay ediler.
Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.
Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.
Sentâbr 7-de İlmi Umerov klinikadan çıqtı.
