Oktâbrniñ ortasında Qırımnıñ eñ büyük suv anbarlarından biri sayılğan – Qarasuvbazar suv anbarı – bent temelindan daa alçaq seviyege qadar eksildi.
Qırım.Aqiqat muhbiriniñ heber etkenine köre, suv anbarınıñ açılğan tübü, evelleri havuzda yaşap suvnı temizlegen, şimdi ise bu yıl ve keçken sene devamında suvnıñ eñ fena derecede quruğanından sebep ölüp ketken qabuqlı özen ayvanları ile tolu.
Qarasuvbazar suv anbarınıñ üst seviyesi daa sentâbr ayında bütünley quruğan edi. Anda tek Biyük-Qarasuv özeniniñ suvı qalğan edi. Oktâbr ayında ava salqınlaşqanına ve yağmırlar yağğanına baqmadan suv anbarı saylaşmağa devam ete.
Qırımnıñ ğarbiy topraqlarına büyük kölemde suv kerek olğanı sebebinden onıñ «suv donorları» – Qarasuvbazar ve Tayğan suv anbarları – suvsız qala. Suv seviyesiniñ eksilmesine devamlı Şarqiy Qırım kanalına suv atılğanı da sebep ola.
Qarasuvbazar suv anbarınıñ üst seviyeleri keçken sene de quruğan edi, lâkin daa keç – dekabr ayında.
Bu yerdeki Qarasuvbazar ve Tayğan suv anbarlarını toldurğan Biyük-Qarasuv özeni Qarasuv-Başı çoqrağında başlana. Bu çoqraq Qırımda eñ büyük sayıla. Qarabiy Yaylanıñ karst suvlarınen teminlengeni içün bu havuzlar er vaqıt çoq suv ile tola ediler.
Qırım Rusiye tarafından işğal etilgen soñ Ukraina yarımadağa Şimaliy-Qırım kanalında suv berilmesini toqtattı. Bu kanal vastasınen Ukraina Qırımnıñ suv ihtiyaclarınıñ 85 fayızını teminley edi.
