«Bu künleri Uquq qorçalayıcı alan merkeziniñ koordinatorı Aleksandra Krılenkova ile beraber oktâbr 12-de Boğurçada yaqalanğan Emil Cemadenovnıñ qorantasını ziyaret ettik. Emilniñ ömür arqadaşı Liana ve tezden üçünci balasını tapacaq qızına qoltutmağa kelgen anası ile subetleştik», – dep bildirdi Qırım.Aqiqatqa Qırım insan aqları bağ gruppasınıñ koordinatorı Abdureşit Cepparov.
Uquq qorçalayıcınıñ Qırım.Aqiqatqa bergen malümatına köre, oktâbr 12-de saba saat altıda Liana ve Emil saba namazını qılmağa turğanda tışarıda ışıq yanğanını kördiler. Emil qapunı açtı ve birden Rusiye uquq qoruyıcıları köründi. Evge Emil olarnen beraber ve bağlı elleri ile kirdi. Liananıñ anası Ramilâ kiyeviniñ elleri çezilmesini talap etti, uquq qoruyıcılar razı oldı.
Gruppa yolbaşçısı özüni tanıttı, FSB idaresiniñ baş taqiqatçısı Sergey Vladimiroviç Kulanov edi. Yanında yigirmige yaqın uquq qoruyıcı bar edi, amma evge er kes kirmedi.
Qararnı kösterip, ekinci qattan tintüv keçirmege başladılar. Ekinci qattan bir şey almadılar. Soñra birinci qat baqıldı. Neticede Emilniñ telefonı, Quran-ı Kerimniñ tercimesi ve «Ahret pasportı» risalesini alıp kettiler.
Bizde bayağı nezaketli ediler. Bahil kiydiler, bazılarğa paket kiymege berdim. Tintüv sessiz keçirildi, balalar bile uyanmadıLiana Cemadenova
«Diger musulman qorantalarında keçirilgen tintüvlerni eşittim ve, doğrusını aytqanda, bizimkinen qıyaslap şaştım. Bizde bayağı nezaketli ediler. Bahil kiydiler, bazılarğa paket kiymege berdim. Tintüv sessiz keçirildi, balalar bile uyanmadı», – dep ayta Liana.
Tezden evniñ yanında Emilniñ qomşuları ve dostları toplaşmağa başladı, tahminen yigirmi kişi keldi. Advokatı Edem Semedlâyev de keldi, onı içeri almadılar. Emilniñ anası da keldi, amma onı da kirgizmediler.
«Oktâbr 12-de saat 6-da tanışım telefon etip, beş qırımtatar qorantasınıñ evinde tintüv keçirilgenini ayttı. Saat 6.40 Cemadenov Emilge keldim, FSB hadimlerine advokat şeadetnamesini kösterip, añlaşqan müşterime tintüvge kirmege rica ettim. Ricam yerine ketirilmedi, eki saat böyler devam etti. Soñra birden kirmege izin berildi. Taqiqatçı taaciplenip, o qadar vaqıt qapunıñ ögünde beklegenimni bilmey edi, dep ayttı. Tintüv endi bitken edi, tintüv protokolını imzalamağa qaldı. Protokolda tenbilerimizni yazdıq», – dep izaatladı vaziyetni Qırım.Aqiqatqa advokat Edem Semedlâyev. O künü yaqalanğan dört musulman kibi Emil de Rusiyede terrorist sayılıp yasaq etilgen «Hizb ut-Tahrir» firqasına ait olması ile qabaatlandı.
Liana ömür arqadaşını müsbet taraftan tasvirley. Emil eki aliy tasil aldı. Qırımda «siyasetşınaslıq» bölüginde, Türkiyede «musafirhane işini» oqudı. Bankta aydavcı-inkassator olıp çalışa, bu işke qusursız insanlar alına.
Liana – zenaat boyunca tiş ekimi. Çiftniñ eki balası bar (2011 senesi doğma Yusuf ve 2013 senesi doğma Yunus oğulları), tezden üçünci balaları olacaq.
Aynı künü saat üçlerde uquq qoruyıcılar Emilniñ Boğurçada oturğan ana-babasında da tintün keçirdiler. Anda bayağı sert yanaştılarLiana Cemadenova
«Aynı künü saat üçlerde uquq qoruyıcılar Emilniñ Boğurçada oturğan ana-babasında da tintün keçirdiler. Anda bayağı sert yanaştılar. Araba qapunı yıqtılar. Emilniñ qardaşlarını yerge yatqızdılar. Er yerni baqıp çıqtılar», – dep bildirdi uquq qorçalayıcılarğa Liana.
Emilniñ anası 62 yaşında. Liananıñ aytqanına köre, o, körgenlerine baqmadan, özüni toplap, diger yaqın soyları ile beraber oğlunı qorçalamağa, onıñ azatlıq aqqını talap etmege azır. Liana da bunı yapa.
Siyasiy mabuslarnıñ soy-soplarını birleştirgen «Qırım birdemligi» de qorantanı ziyaret etip, olarğa qoşulmağa teklif etti.
