Oktâbr 12 künü Mamaq qasbasında apiske alınğan Ayder Saledinovnıñ babası Dilâver Saledinov Qırım.Aqiqat mühbirine bergen izaatında Qırımda andi er musulman kişi özüni havflı vaziyette iss etkenini ayttı.
«Bügün musulmanğa Qırımda özüni rahat iss etmege pek qıyın. Bir kitap oquğanından terroristke çevirilmek mümkün olğanını aslı aqılıma ketirmez edim. Böyle isnandan cemiyetke bir zararı yoq. Menim oğlum ömürinde silâ elinde tutmadı, amma diniy kitaplar oquğanı içün onı terrorizimde qabaatladılar», – dey Dilâver Saledinov.
Qırımda musulmanlarğa qarşı yapılğan basqılarnıñ yañı dalğasıislâm dinini kütkenlerge qarşı umumiy repressiya siyasetine kirgenini Alandaki uquq qorçalayıcı merkeziniñ idarecisi Aleksandra Krılenko da tasdiqlay.
Oktâbr 12-de Qırımda beş musulman qorantasınıñ evinde tintüv keçirildi. Beş qırımtatarı Rusiyede yasaq etilgen «Hizb ut-Tahrir» teşkilâtında iştirak etkenleri qabaatınen yaqalandı: Rustem İsmailov, Abdullayev Uzair, Abdullayev Teymur, Cemadinov Emil, Saledinov Ayder.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
