Oktâbr 20, cumaaqşamı künü Bağçasarayda qırımtatarlarnıñ evlerinde Rusiye silâlı quvetler tarafından tintüvler keçirildi. Bunı Qırımtatar Milliy Qurultayınıñ MSK reisi Zair Smedlâyev Facebookta bildirdi.
«Bağçasarayda, Han-Çair qasabasında A.Krımskiy, 38 adresi boyunca Enver ve Asan Serverovnıñ evinde tintüv keçirile, qomşu soqaqta Abduveliyev Enverniñ evinde de tintüv ötkerile», – haber etti Smedlâyev.
Qırım.Aqiqatqa izaat berip, Smedlâyev dedi ki, qırımtatarldan birinde tintüvniñ keçirilmesine – onıñ Qırım qamaçavınıñ idarecisi Lenur İslâmov ile resimge çıqqanı ve resimniñ internette yerleştirilmesi oldı.
«Şimdi tintüv yekünlendi, kompyuterni alıp kettiler. Olardan birinde Lenur İslâmov ile birlikte çekilgen resim internetke tüşken eken! Yani, bu (tintüv – QA) anti-terror tedbirleriniñ çerçivesinde keçirildi», – dedi Smedlâyev Qırım.Aqiqatqa.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
