Kreml kontrol etken Qırım parlamenti çarşenbe künü, oktâbr 19-da, üç komitetniñ yolbaşçısını tayinledi. Aleksandr Şuvalov emek, içtimaiy imaye, sağlıq saqlav ve veteranlar işleri komiteti, İgor Budanov agrar siyaseti, ekologiya ve tabiat resursları komiteti, Nina Permâkova ise medeniyet ve medeniy mirasnı qoruv meseleleri komitetiniñ yolbaşçısı oldı.
Bunı Kreml kontrol etken Qırım parlamentiniñ matbuat hızmeti bildire.
Vladimir Konstantinov bildirdi ki, komitetlerniñ yañı yolbaşçıları – yerli idare organlarında çalışqan tecribeli insanlardır.
Bundan evel Qırım parlamenti Natalya Malenkonı parlament reisiniñ muavini vazifesine, yarımada ükümeti reisiniñ muavini olaraq ise İgor Mihayliçenkonı sayladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
