Suriye akimiyeti işğal etilgen Qırımnı Rusiyeniñ bir parçası olaraq tanıy. Bunı Suriye parlamentiniñ reisi Hadiya Abbas Sputnik Rusiye neşirine bergen intervyüsında bildirdi.
«Qırım halq referendumda istegini köstergen soñ tamırlarına qayttı. Qırım Rusiyeniñ ayırılmaz bir parçası olğanını tanıymız», – dep ayttı Hadiya Abbas.
Ukrainadaki Suriye Arap Cumhuriyetiniñ elçihanesi telefonda Hadiya Abbasnıñ beyanatını izaatlamay.
Qırım.Aqiqat bunıñnen bağlı informatsion muracaat azırlay.
Rusiye mudafaa naziri Sergey Şoygu bildirdi ki, Rusiye ve Suriye aviatsiyası isyancı ve barışıqsever sakinlerge şeerni terk etmege imkân berecek pauzadan eki kün ögüne Aleppoda ava darbeleriniñ endirilmesini toqtattı.
Suriyede 2011 senesinden berli cenk kete. Prezident Başar Asad memleketniñ bir qısmını kontrol ete, onıñ siyasetine razı olmağan isyancılar diger qısımnı nezaret ete. Daa bir qısmı «İslâm devleti» radikal gruppirovkasınıñ kontroli altında buluna.
Rusiye 2015 senesi küzde Suriyede Asad tarafında cenk kampaniyasına qoşuldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
