Qırımtatar faali, Kefe regional meclisiniñ azası Suleyman Kadırov dey ki, yarımadada onı Ukrainağa qoltutqanından sebep taqip eteler. O, FSB hadimleri ekspertizağa yollağan videonı izaatlağanını hatırlamay, dep bildirdi Qırım.Aqiqatqa.
«2016 senesi mart 29-da «Qırım – Ukrainadır» izaatını yazğanım ile qabaatlaylar. Amma bunı yazğanımnı hatırlamayım. Men Ukrainağa qoltuttım ve qoltutam, amma bunı yazğanımnı hatırlamayım. Mence, mahsus hızmetler meni yerime oturtmaq içün manaçıq uydurdılar», – dep ayttı Kadırov.
Kadırovğa ekspertiza vaqtında ögrenilecek video muracaatını Demyan Demyançenko adında biri yazğanını ögrendi. Anda «Qırım» göñülliler taqımı batalyonına maddiy yardım köstermek çağıruvları mevcuttır.
Salı künü, oktâbr 18-de, FSB hadimleri Suleyman Kadırovnı lingvistik ekspertiza keçirilecegine dair qarar ile tanış ettiler.
Hatırlatam, oktâbr 5-de Rusiye uquq qoruyıcıları qırımtatar faali Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv mahkemeci Rodionov İgor İvanoviçniñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.
Oktâbr 11-de Suleyman Kadırovğa qarşı separatizm içün cinaiy iş açıldı.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
