Salı künü, oktâbr 18-de, Rusiye kontrol etken Qırım Yuqarı mahkemesi Aqmescitniñ Merkeziy rayon mahkemesi «fevral 26 işiniñ» iştirakçisi Ali Asanovğa çıqarğan qararını deñişmesiz qaldırdı.
Böylece, Ali Asanov 2017 senesi yanvar 7-ne qadar SİZOda yatacaqtır, dep bildirdi advokat Edem Semedlâyev Facebookta.
«Qırım Cumhuriyetiniñ Yuqarı mahkemesi Aqmescit şeeriniñ Merkeziy rayon mahkemesiniñ mahkemecisi yaqarğan ükümni deñiştirmedi. Asanov Ali 07.01.2017 qadar SİZOda yatacaqtır», – dep yazdı Semedlâyev.
Advokatnıñ aytqanına köre, mahkemeci imayeniñ «mahküm etilgen Asanov Ali qafeste degil de, advokat yanında olsun» muracaatını red etti.
«Faqat prokuror Dilâra Serverovna Ali Asanovnıñ statusını bile soramayıp, Aliniñ qafesten çıqmasına qarşı çıqtı ve onı SİZOda tutsınlar istedi. Lâkin güzel daqqalar da oldı. Ali büyük qızı Gülnaranı öpip laf etip oldı», – dep qoştı Semedlâyev.
Rusiye Qırımnı işğal etken soñ yarımadada 2014 senesi fevral 26-da Ukraina topraq bütünligine qoltutuv mitinginde iştirak etken qırımtatar faalleri mahkeme etilmege başladı. O vaqıt olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Rus birligi» firqasınıñ faalleri çıqqan edi.
İyül 20-de qapalı oturışta mahkeme «fevral 26 işini» ekige böldi: Qırımtatar Milliy Meclisiniñ reis muavini Ahtem Çiygoz işi ve esnasnıñ diger şahısları – Ali Asanov ve Mustafa Degermenciniñ işi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
