Kremlin nezareti astındaki Qırım yolbaşçısı Sergey Aksönov işğal olunğan Qırımda Sport naziri vazifesine Yelizaveta Kojiçevanı tain etti. Bunı Aksönovnıñ matbuat-hızmeti bildire.
«Kojiçeva Yelizaveta Vasilyevnanı Qırım Sport naziri devlet vazifesine tainlep, Qırım Sport naziriniñ birinci muavini vazifesinden boşatmaq», – dep aytıla Aksönovnıñ resmiy emrinde.
İşğal etilgen Qıırımda evelki Sport naziri Georgiy Şestakovnı Aksönov bu sene aprel ayında işinden çıqarğan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
