Qırımda «Qomşularım» leyhası Halqara islâm missiyasınıñ yardımınen başladı, dep bildire Kremlge boysunğan Qırım ve Aqyar musulmanları Diniy idaresiniñ matbuat hızmeti (QAMDİ).
Berilgen malümatqa köre, leyhanıñ teşebbüsçisi Curçı rayonınıñ musulman cemiyeti rayon memuriyetiniñ yardımınen oldı. Leyha maqsadı – «Qırımnıñ çoq milletli müitinde qomşu munasebetleriniñ inkişafı ve pekitmesidir». Dersler rayonnıñ on mektebinde keçirilecektir.
Rayonnıñ musulman cemiyeti reisi Vaid Bilâlov bildire ki, dersler 9-10 sınıf talebelerinen yapıla.
«Talebeler qomşular arasında yüz bere bilecek farqlı vaziyetlerni talil ete, insanlarnıñ birleştirgen ya da zıddiyet içün sebep olğan şahsiyet çizgilerini ögrene, em de qomşular arasındaki vaziyetlerni tasvir etip, müsbet taraflarını tapmağa tırışalar», – dep tarif etti Bilâlov.
QAMDİ qayd etkenine köre, ilk üç ders rayonnıñ üç köyünde olıp keçti – Yüdendorf (Oktâbrskoye), Qıyat (Ostrovskoye) ve Sarıbaş. Qırımnıñ diger köy mekteplerinde de dersler keçirilmesi planlaştırılar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
